Urtero legez, 2025 urteari ere mendian emango diogu hasiera. Hitzordua 9:00etan izango da plazan, eta 11:00ak aldera turroia eta xanpaina izango dira Erlo gailurrean. Animatu urte berria modurik onenean hastera!

Ostegun honetan Karlos Aretxabaleta ‘Txapel’ mendizale, eskalatzaile eta idazle bizkaitarra izango dugu Mendietxen, ‘Izarrak eta Haitzak’ liburua aurkezten. Lan honetan, mendizale ospetsu eta ez hain ospetsuekin izandako solasaldietan bildutakoa jasotzen du (esaterako, Edurne Pasaban, Juanjo San Sebastian, Pou anaiak, Alex Txikon, Alberto Iñurrategi…). Animatu!

• Eguna: Abenduak 26, osteguna.
• Ordua: 19:00.
• Lekua: Mendietxe Museoa (Azpeitia).
• Sarrera: Libre.

Urtero bezala, aurten ere Aizkorrira irteera egingo dugu Urtezahar Egunean, ohiko ibilbidea jarraituz: Otzaurtetik atera, gailurrera igo eta Urbiara jaitsi, Arantzazurako bidea eginez amaitzeko.

Gure irteera klasikoetako bat, urteari gehien gustatze zaiguna eginez agur esateko: mendian!

Izen ematea jada martxan dugu gure web orrian, beraz animatu eta etorri gurekin!

• Eguna: abenduak 31, asteartea.
• Irteera: goizeko 7:00etan, anbulategi aurretik.
• Ordaina (autobusean bertan egingo da):
  • Bazkideak: 10 euro.
  • Bazkide ez direnak: 15 euro.
• Izena emateko azken eguna: abenduak 28, larunbata.

Azpeitia-Gasteiz, Hiru Handietatik barrena. Hauxe izango da Lagun Onak Mendi Bazkunak 2025 urtean egingo duen helduen etapazko ibilbide luzea. Azken urtetako formatu berarekin dator ekimena: hilean etapa bat eginez, eta bidean zehar eskualde eta tontor ezberdinak zeharkatu ostean, bi herri lotzea. Azken urteetan egin diren ekimenak mapan jarriz gero, Gasteiz aldera gerturatzea falta zitzaien Lagun Onak MBko mendizaleei, eta horixe izango da hurrengo urteko helburua.

Ekimena erakargarriago egiteko, bidea Hiru Haundietatik barrena egitea proposatzen da. Hau da, Araba, Bizkaia eta Gipuzkoako hiru tontor nagusietatik igarotzea: Aizkorri (1.523 metro), Anboto (1.331 metro) eta Gorbea (1.482 metro). Ibilbidea zazpi etapatan egitea aurreikusten da, eta guztira 190 kilometroko inguru osatuko dira. Egitasmoa ahalik eta mendizale gehienentzat egingarriagoa izateko, hirugarren eta bosgarren etapak Aizkorri eta Anboto tontorretatik igaro gabe egiteko aukera emango zaie parte hartzaileei.

Azpeitia-Gasteiz ibilbide luzeak azken urteetan Lagun Onak Mendi Bazkunak antolatu dituen helduentzako etapazko ekimenen antzeko planteamendua dauka. Hau da, Azpeitia-Hazparren (2017), Azpeitia-Bilbo kostatik (2018), Ardoaren eta arrainaren ibilbidea (2019), Azpeitia-Iruñea (2022), Azpeitia-Hiru Erregeen Mahaia (2023) eta Tutera-Azpeitia (2024). Ekimena mendizale, ibiltari edo naturazaleei orokorrean zuzendua dago.

Etapaz etapa

Lehenengo etapak Azpeitia eta Zumarraga lotuko ditu. Horretarako, Izarraitz Birako bidetik Otarrera igo, eta handik Zazpi Kurutze Mendi Martxako ibilbidea jarraituko dute mendizaleek. Bigarren etapan, Arranoaitz mendia igoko dute, eta Udanatik pasa ostean Zegamarako bidea egingo dute parte hartzaileek, Aizkorriren magaletik. Mendi hau hirugarren etapan igoko dute, eta ondoren Arantzazun amaituko da eguneko txangoa.

Laugarren etapan Arabako lurretan sartuko dira mendizaleak, bidean Andarto eta Degurixa bezalako paraje ezagunak zeharkatu ostean. Landako urtegian amaituko dute eguna. Bosgarren jardunaldian Otxandiorako bidea egingo dute mendizaleek, tartean Anboto gailurrera igota. Seigarren etapan, aldiz, Gorbea izango da protagonista, eta mendi hau egin ostean Murgiara jaitsiko dira parte hartzaileak. Azkenik, Murgia-Gasteiz izango da azkeneko etapa.

Aurreikusten den egutegia honakoa izango da: